​حكايات الشويخ - الحكاية الحادية عشر: "عدّاء الإسلام الأول (سَلَمَة بن الأكوع)"

بداية القسم الثاني: نجوم في سماء الصحابة
بجريدة الأنباء الدولية
بقلم عثمان الشويخ
​يا أهلاً بيكم في الحلقة الحادية عشر من حكاياتنا الرمضانية، والنهاردة بنبدأ مع بعض "القسم الثاني" من سلسلة (حكايات الشويخ). في الجزء ده، هنتعرف على شخصيات عظيمة من صحابة النبي صلى الله عليه وسلم، ولكن للأسف كثير منا يجهل هؤلاء الكواكب والنجوم الذين قال فيهم النبي صلى الله عليه وسلم: «أصحابي كالنجوم بأيهم اقتديتم اهتديتم». نرجو من الله سبحانه وتعالى أن ينفع بنا وبكم في أول حكاية بهذا القسم.
​النهاردة قررنا نغير الوجهة شوية، ونروح لمنطقة "الصحابة المنسية". وخلوني أكون صريح معاكم، لو سألت أي حد فينا، وأنا شخصياً قبل ما أقرأ وأبحث، عن بطل حكايتنا النهاردة، غالباً مش هيعرفه غير المتخصصين. الحقيقة إن أجيالنا الجديدة، أجيال السوشيال ميديا، آخر معرفتهم بالتاريخ هما الخلفاء الراشدين، وممكن كمان يتلخبطوا في ترتيبهم أو أسمائهم وعشان كده هدفنا النهاردة إننا نطلع بطل "خارق" من قلب التاريخ، بطل لو شفتوا قصته هتعرفوا إننا عندنا أبطال وعظماء حقيقيين.

​المعجزة البشرية.. سَلَمَة بن الأكوع
حكايتنا عن (سَلَمَة بن الأكوع).. الراجل اللي كان بيسبق الخيل وهو بيجري على رجله تخيلوا يا شباب إننا قدام بطل رياضي من طراز رفيع جداً، كان أسرع إنسان في العرب، وموهبته دي هي اللي خلته بطل ملحمة "غزوة ذي قَرَد".
​الحكاية بدأت لما مجموعة من المشركين هجموا على إبل النبي صلى الله عليه وسلم وقتلوا الراعي وخطفوا الإبل وهربوا. 
سَلَمَة بن الأكوع كان لوحده، مكنش معاه حصان ولا جيش، لكن كان معاه "عزيمة" ورجلين مبيعرفوش التعب. طار وراهم جري، وفضل يطاردهم من جبل لجبل، يضربهم بالنبل ويرتجز ويقول بصوته القوي:
(خُذها وأنا ابنُ الأكوع.. واليومُ يومُ الرُضَّع)
​فضل سَلَمَة وراهم لوحده، يضرب ده ويوقع ده، لحد ما خافوا منه وافتكروه جيش كامل، وسابوا الإبل كلها وهربوا لما جيش المسلمين وصل بقيادة النبي صلى الله عليه وسلم، لقوا سَلَمَة رجّع الإبل كلها لوحده "جري". يومها النبي صلى الله عليه وسلم ضحك وقال جملة هي أعظم وسام رياضي وعسكري في التاريخ: (خيرُ رجّالتنا سَلَمَة بن الأكوع).

​رسالة للشباب:
إحنا بنحكي عن سَلَمَة عشان نقول للشباب إن القوة مش بس سلاح، القوة إنك تكتشف الموهبة اللي ربنا أداها لك وتستخدمها صح. سَلَمَة كان موهبته السرعة، فاستخدمها عشان يحمي مال المسلمين ويرجع حقهم. يا ريت نقرأ عن أبطالنا دول، ونعرف إن تاريخنا مليان شخصيات لو عرفناها، هنحس بفخر حقيقي ونعرف إننا أمة مبيخلصش فيها البطولات. وللاطلاع على التفاصيل الكاملة للقصة ستجدونها في (صحيح مسلم).
​رمضان مبارك عليكم، واستنونا في الحكاية الجاية من حكايات الشويخ.
​#حكايات_الشويخ #عثمان_الشويخ #سلمه_بن_الأكوع #صحابة_رسول_الله #القسم_الثاني #جريدة_الأنباء_الدولية #رمضان_2026
​